8 December 2009

ഒരു 'യുവബ്ലോഗന്റെ' വിലാപങ്ങള്‍....


തൂലിക (സോറി വിരല്‍) പടവാളാക്കണം എന്ന് നിശ്ചയിച്ചുറപ്പിച്ചതുകൊണ്ടാണ്  യുവബ്ലോഗന്‍ തന്റെ ഡയല്‍ അപ്പ് കണക്ഷന്‍ മാറ്റി ബ്രോഡ്‌ ബാന്‍ഡ് എടുത്തത്.

പോക്കറ്റ് അത്ര ബ്രോഡ്‌ അല്ലാത്തത് കൊണ്ട് എംബികളെ മറന്നു കൊണ്ട് അയാള്‍ കെബികളെ  സ്നേഹിച്ചു . കെബി കളില്‍ നിന്നും എംബി കളില്‍ എത്തി നില്‍ക്കുന്ന ജീവിതതാളം മാറുന്ന ലോകത്തിന്റെ മൂല്യച്ചുതി വെളിപ്പെടുത്തുന്നുവോ എന്ന ആശങ്ക പങ്കുവയ്ക്കാനായി അയാള്‍ ജി-ടാക്കിലെ തന്റെ ബ്ലോഗ്‌ ഗുരുവിനു മെസ്സേജ് അയച്ചു...

ബ്ലോഗ്‌ ഗുരു അന്റാര്‍ട്ടിക്കയിലെ തന്റെ ഗ്രൂപ്പ്‌ സഹബ്ലോഗനുമായി കൂലങ്കഷമായ  ജി ടാക്കിലായിരുന്നു..!!

...മലയാളഭാഷയിലെ സാംസ്കാരിക നായകന്മ്മാര്‍ക്കും അച്ചടി മാധ്യമങ്ങള്‍ക്കും ബ്ലോഗുകളോടുള്ള വിരക്തിയെപ്പറ്റി അന്റാര്‍ട്ടിക്കന്‍ പ്രവാസി ബ്ലോഗറോട് രോഷം കൊള്ളുന്നതിനിടെയാണ് യുവബ്ലോഗന്റെ 'ഹായ് ' അയാള്‍ കാണുന്നത്.....

അന്റാര്‍ട്ടിക്കയില്‍ 'ഷിവാസ് റീഗലി'ന്റെയും വാടാനപ്പള്ളീല്‍ 'ഓപീയാറി'ന്റെയും കുപ്പികള്‍ ഏതാണ്ടൊരേ സമയത്തു തന്നെ ഒഴിഞ്ഞിരുന്നത് കൊണ്ട് മാത്രം ഗുരു കയ്യിലെ കാലി ഗ്ലാസ് താഴെ വച്ച് ശിഷ്യന് റിപ്ലേ അയച്ചു..

''യെസ് ശിഷ്യാ..പറയൂ..''

''ഒരു പുതിയ പോസ്റ്റിനുള്ള തീം കിട്ടിയിട്ടുണ്ട് ഗുരോ....അതു താങ്കളുമായി ചര്‍ച്ച ചെയ്യാം എന്ന് വിചാരിച്ചു...''

''പറയൂ...എനിക്കുറപ്പാണ് നിന്നെപ്പോലെ ഒരു പ്രതിഭാധനനായ യുവ ബ്ലോഗന്റെ തലയില്‍ നല്ല നല്ല ആശയങ്ങള്‍ ഉണ്ടെന്ന്.....''

''ബ്ലോഗില്‍ പിച്ചവെക്കാനും അപ്പിയിടാനും എന്നെ പഠിപ്പിച്ച എന്റെ പ്രിയ ബ്ലോഗ്‌ ഗുരുവിന് ഞാന്‍ ഈ പോസ്റ്റ്‌ സമര്‍പ്പിക്കുന്നു.....'' എന്നൊരു കമന്റ്‌ യുവബ്ലോഗന്റെ പുതിയ പോസ്റ്റിനു കീഴെവരാന്‍ സാധ്യതയുണ്ടെന്നോര്‍ത്തപ്പോള്‍ ബ്ലോഗ്‌ കവിഗുരു സന്തുഷ്ടനായി..

''ടെക്നോളജിയുടെ പുരോഗതിയില്‍ ജീവിത താളം എങ്ങനെ വ്യത്യാസപ്പെടുന്നു എന്നാണ് ഞാന്‍ ചിന്തിക്കുന്നത്...ലോകത്തിനു വേഗം കൂടുന്നതിനനുസരിച്ച് ജീവിതത്തിന്റെ സ്പന്ദനം മാറുന്നുവോ..''

ഗുരു അല്‍പ്പനേരം ചിന്തയിലാണ്ടു... 

''നല്ല തീം..നര്‍മത്തില്‍ ചാലിച്ചാണോ എഴുതുന്നത്‌..?''

''ചാലിക്കണമെന്നുണ്ട്...പക്ഷെ എനിക്ക് നര്‍മം വഴങ്ങുമോ എന്ന് സംശയമാണ് ഗുരോ..''

''നര്‍മത്തില്‍ ചാലിച്ചില്ലെങ്കില്‍ ഒരു തുടക്കക്കാരന്റെ ബ്ലോഗ്‌ ശ്രദ്ധിക്കപ്പെടാന്‍ പ്രയാസമാണ് ശിഷ്യാ...''

യുവബ്ലോഗന്റെ രക്തം തിളച്ചു...തിളച്ച രക്തം അയാള്‍ ഗുരുവുമായി പങ്കുവച്ചു..

''ഈ ബൂലോഗം ശരിയല്ല....കുറെ ഗള്‍ഫുകാര്‍ ഒരു പണിയുമില്ലാതെ പൂത്ത പൈസയുമായി ഓഫീസുകളില്‍ നര്‍മം ചാലിച്ച ചവറുകളും വായിച്ചു സമയം കൊല്ലുന്നു..!! കേരളത്തിലെ  അടിസ്ഥാന വര്‍ഗം ബ്രോഡ്‌ ബാന്‍ഡ് കണക്ഷന് മാസാമാസം എണ്ണികൊടുക്കേണ്ട 250 രൂപയെക്കുറിച്ച് വ്യാകുലപ്പെടുന്നത് കാണുമ്പോള്‍ ഇവര്‍ക്കൊക്കെ പുച്ചവും...ഇതിലൊക്കെ പ്രതികരിക്കേണ്ട സമയമായിരിക്കുന്നു.''

''പ്രതികരിക്കണം തീര്‍ച്ചയായും പ്രതികരിക്കണം കപടനൊസ്റ്റാള്‍ജിയയും പറഞ്ഞു കരയുന്ന ഇവന്മ്മാരെ നമ്മള്‍ വെളിച്ചത്തു കൊണ്ട് വരേണ്ടിയിരിക്കുന്നു...''
......പിന്നെ ശിഷ്യാ..എനിക്ക് അത്യാവശ്യമായി ഒന്നു പുറത്തു പോകണം...മനസ്സിലുള്ളതെല്ലാം എഴുതൂ..നിങ്ങളെപ്പോലുള്ളവര്‍ നാളെകളുടെ വാഗ്ദാനങ്ങളാണ്...''

തന്റെ NRI ആരാധിക ഓണ്‍ലൈനില്‍ വന്നത് കണ്ടപ്പോള്‍ ഗുരു പതുക്കെ തടിയൂരി...പച്ചപുതച്ച മല നാടുവിട്ടു മരുഭൂമിയില്‍ കുടിയേറേണ്ടി വന്ന ആരാധികയുടെ ദുഖത്തില്‍ അയാള്‍ ഇന്‍വിസിബിള്‍ മോഡില്‍ പങ്കുചേര്‍ന്നു. അവള്‍ക്ക് വേണ്ടി മാത്രമായെഴുതിയ ഗൃഹാതുരത്വം നിറഞ്ഞ കവിത ഹെഡ് ഫോണിലൂടെ  പാടിക്കേള്‍പ്പിച്ചു...കോപ്പിറൈറ്റ് ഇല്ലാത്ത ബ്ലോഗ്‌ പോലെ വിശാലമായ ആരാധികാ ഹൃദയം തരളിതമായി.. പുഴയോരത്തു കറങ്ങി നടക്കുകയായിരുന്ന രമണന്റെ ആത്മാവ് പോലും അതു കേട്ടു നാണിച്ചു പോയി.......

യുവബ്ലോഗന്‍ പക്ഷെ തീര്‍ത്തും വ്യാകുലനായിരുന്നു....അയാളുടെ മനസ്സിലൂടെ ചിന്തകള്‍ അന്തമില്ലാതെ ഓടിനടന്നു.. 

എങ്ങനെ ഫെയ്മസാകാം...??

നര്‍മം ചലിച്ചാല്‍ ഫെയ്മസാകുമോ...എന്തെഴുതും...എങ്ങനെയെഴുതും...എങ്ങനെ അറിയപ്പെടുന്ന ഒരു 'മുതിര്‍ന്ന' ബ്ലോഗറാകും..?

കീബോര്‍ഡില്‍ കുരുക്ഷേത്രം തീര്‍ക്കാനുള്ള തന്റെ വിരലുകള്‍ക്കു ശക്തി പകരാനായി അയാള്‍ ഗുരുക്കന്മാരെ മനസ്സില്‍ നമിച്ചു....

512MB ഇന്റര്‍നെറ്റ്‌ സ്പീഡിന്റെ ആവേശത്തള്ളിച്ചയില്‍ കിടിലന്‍ പോസ്റ്റുകളിടാനുള്ള  വ്യഗ്രതയില്‍
അയാള്‍ തന്റെ രണ്ടാം ബ്ലോഗ്‌ ഗുരുവിന്റെ മൊബൈല്‍ നമ്പര്‍ ഞെക്കി....

രണ്ടാം ബ്ലോഗ്‌ ഗുരു നാലാമത്തെ പെഗ്ഗിലായിരുന്നു....

ബൂലോഗത്തെ ഒരു തുറന്ന വിഴുപ്പലക്കലിന്റെ (aka , ''The Thirteenth Comment War‍'' ) ഭാഗമായി 'പുള്ളിപ്പുലി സീരീസില്‍' നിന്നും 'കഴുതപ്പുലി സീരീസിലേക്ക് ' ഡൌണ്‍ഗ്രേഡ് ചെയ്യപ്പെട്ട രണ്ടാം ബ്ലോഗ്‌ ഗുരു ,പാതിരാത്രി മൊബൈലില്‍ വന്ന കോള്‍ ലീവില്‍ നാട്ടില്‍ വന്ന വല്ല പ്രവാസി ബ്ലോഗറുടെതും ആകണേ എന്ന പ്രാര്‍ത്ഥനയിലാണ് അറ്റന്‍ഡ് ചെയ്തത്.....

തുറന്നു വച്ച സ്കോച്ച് കുപ്പിക്കപ്പുറമിപ്പുറം ബൂലോഗചര്‍ച്ചയുടെ മൊരിഞ്ഞ കോഴിമണം മനസ്സില്‍ കണ്ടു കൊണ്ട് അയാള്‍ സംസാരിക്കാനാരംഭിച്ചു...

''യെസ്...ബ്ലോഗ്ഗര്‍______ഹിയര്‍.........''

പക്ഷെ മറുതലയ്ക്കല്‍ ഇതുവരെ അഞ്ച് കമന്റ്‌ തികച്ചു കിട്ടിയിട്ടില്ലാത്ത ദരിദ്രവാസി യുവബ്ലോഗനാണെന്ന റിഞ്ഞപ്പോള്‍ രണ്ടാം ബ്ലോഗ്‌ ഗുരുവിനു ദേഷ്യം അരിച്ചു കയറി...പിന്നെ തന്റെയൊരു സ്ഥിരം കമെന്റെഴുത്തു കാരനെ പിണക്കേണ്ടെന്നുകരുതി മാത്രം അയാള്‍ യുവബ്ലോഗനോട്  സംസാരിച്ചു...

''ഇതുവരെ ആരും പറയാത്ത അല്ലെങ്കില്‍ തൊട്ടാല്‍ പൊട്ടുന്ന വിഷയങ്ങളുമായി വരൂ അതു ചര്‍ച്ചക്കിട്ടു ഞാന്‍ തന്നെ ഫെയ്മസാക്കിത്തരാം...''

''അതിനിപ്പോ അങ്ങനുള്ള വിഷയങ്ങള്‍ ഇപ്പൊ.....ലവ് ജിഹാദ് മാര്‍ക്കറ്റ്‌ കഴിഞ്ഞില്ലേ...വേറെന്താ ചൂടുള്ള ഒരു സബ് ജെക്റ്റ്...''

''അതു താന്‍ കണ്ടു പിടിക്കണം....''

രണ്ടാം ബ്ലോഗ്‌ ഗുരുവും ഫോണ്‍ കട്ട്‌ ചെയ്തു....

ഫെയ്മസാകാനുള്ള ത്വരയില്‍ യുവ ബ്ലോഗന് ഇരിപ്പുറച്ചില്ല..അയാള്‍ വീണ്ടും അന്തമില്ലാതെ ചിന്തിച്ചു കൊണ്ടിരുന്നു....

പാലായിലെ ഗള്‍ഫുകാരന്റെ അടച്ചിട്ട വീട് പോലെ അനാഥമായിപ്പോയേക്കാവുന്ന തന്റെ ബ്ലോഗ്‌ മനസ്സില്‍ കണ്ടപ്പോള്‍ അയാള്‍ വീണ്ടും ഇരുന്നും നിന്നും കിടന്നും ടോയ് ലെറ്റില്‍ പോയിരുന്നും ആലോചിച്ചു....
ഒട്ടേറെ മഹാന്മാര്‍ക്ക് വെളിപാടുണ്ടായ ടോയ് ലെറ്റ്‌ സീറ്റില്‍വച്ച് അയാളിലും പുത്തന്‍ ആലോചനകളുടെ വെള്ളിടികള്‍ വെട്ടിത്തുടങ്ങി....

''എന്ത് കൊണ്ട് അറിയപ്പെടുന്ന ഒരു കഥാപാത്രത്തെ തന്റെതായ രീതിയില്‍ മാറ്റി എഴുതിക്കൂടാ..?''

എം.ടി , ചതിയന്‍ ചന്തുവിനെ നല്ലവനാക്കി ഫെയ്മസായില്ലേ..?
അതു പോലെതന്നെ....!

തന്റെ ഭാവന പ്രദര്‍ശിപ്പിച്ചു കൊണ്ട് അയാള്‍ ആര്‍ക്കിമിഡീസിനേക്കാളും വേഗത്തില്‍ ഇറങ്ങിയോടി...
തന്റെ പുത്തന്‍ ആശയം ബ്ലോഗ്‌ ഗുരുക്കന്‍മാര്‍ ചൂണ്ടിയേക്കും എന്ന ചിന്തയില്‍ ആരോടും ചര്‍ച്ച ചെയ്യാതെ കഥാപാത്രങ്ങളോട് നേരിട്ട് തന്നെ സംവേദിക്കാന്‍ തീരുമാനിച്ചു...

ചരിത്രത്തിലെയും പുരാണങ്ങളിലെയും ക്രൂര കഥാപാത്രങ്ങളെ എടുത്തു നല്ലവരാക്കണം...അങ്ങനെ തന്റെ പോസ്റ്റുകള്‍ ചര്‍ച്ച ചെയ്യപ്പെടണം..കമന്റുകള്‍ കുന്നു കൂടണം...ബൂലോഗ അഭിമുഖങ്ങള്‍ വരണം..കോക്കസുകള്‍ രൂപം പ്രാപിക്കണം...നല്ലതോ ചീത്തയോ എന്ന അസ്തിത്വപ്രശ്നം അടിസ്ഥാനമാക്കുന്ന തന്റെ പോസ്റ്റുകള്‍ ബൂലോഗത്തിന്റെ ഓരോ കോണിലും ചര്‍ച്ച ചെയ്യപ്പെടുന്നത് മനസ്സിലൂടെ കടന്നുപോയപ്പോള്‍ അയാളുടെ ദേഹത്തെ രോമങ്ങള്‍ എണീറ്റു നിന്നു അവയ്ക്ക് ഐക്യദാര്‍ഡ്യം പ്രകടിപ്പിച്ചു...

പക്ഷെ ആരെ ആദ്യം നല്ലവനാക്കും?..ഒരു കിടിലന്‍ ദുഷ്ടകഥാപാത്രത്തെ കണ്ടു പിടിക്കേണ്ടിയിരിക്കുന്നു....
പക്ഷെ അയാളില്‍ ഒട്ടും നന്മ പാടില്ല....എന്നാലേ അതു ചര്‍ച്ച ചെയ്യപ്പെടൂ...

ദുര്യോധനനെയും രാവണനെയും കീചകനെയുമെല്ലാം പലരും പലപ്പോഴായി നന്നാക്കി നോക്കിയതാണ്.. ....കീരിക്കാടന്‍ ജോസിനെയാണെങ്കില്‍ ലോഹിതദാസ് ഓള്‍റെഡി നല്ലവനാക്കി കഴിഞ്ഞു....പിന്നെ മുണ്ടക്കല്‍ ശേഖരന്‍,ഹിറ്റ്‌ ലെര്‍,ഈദി അമീന്‍ ...എന്ന് തുടങ്ങി നാഥുറാം ഗോഡ് സേ വരെ ധീരനായകന്‍മാരായി ഉയര്‍ത്തപ്പെട്ടു കഴിഞ്ഞു...!!

ദുഷ്ടകഥാപാത്രങ്ങളെ കിട്ടാതെ യുവബ്ലോഗന്‍ നട്ടം കറങ്ങി.....

ലേറ്റസ്റ്റ് ദുഷ്ടന്‍ തടിയന്റവിട നസീറാണ്....

പിന്നെ വേണമെങ്കില്‍.... അജ്മല്‍ കസബ്...!!

ആന്റി ടെററിസ്റ്റ് സ്ക്വാഡ് പാതിരാത്രി ഹെലി കൊപ്ടറില്‍ തൂങ്ങിയിറങ്ങി വീടിന്റെ ഓടിളക്കി അകത്തു കയറുന്നത് മനസ്സിലോര്‍ത്തപ്പോള്‍ അവരെയും വിട്ടു...

ദൈവമേ ഈ ലോകത്ത് ദുഷ്ടകഥാപാത്രങ്ങള്‍ക്ക് ഇത്രയും ക്ഷാമമോ..??

യുവബ്ലോഗന്‍ വീണ്ടും വിവശനായി ....വേറെന്തെങ്കിലും വഴികള്‍ ചിന്തിക്കേണ്ടിയിരിക്കുന്നു....

ഒരുഗ്രന്‍ ലവ് സ്റ്റോറി എഴുതിയാലോ...

സെന്റിമെന്റ്സ് പാക്ക്ഡ് റൊമാന്റിക്‌ സ്റ്റോറി....
നല്ല മാര്‍കെറ്റ് ആയിരിക്കും...സോഫ്റ്റ്‌വെയര്‍ എഞ്ചിനീയര്‍ ചെല്ലക്കിളികള്‍ ഒരുപാടെണ്ണം നിലാവത്ത് ഇറക്കിവിട്ട പിടക്കോഴികളെ പോലെ  ഓണ്‍ലൈന്‍ കയറിയിറങ്ങി നടപ്പുണ്ട്...സെന്റിയില്‍ വീഴാത്ത പെണ്‍പിള്ളേരുണ്ടോ..ഒത്താല്‍ പോസ്റ്റ്‌ കേറി ഹിറ്റാകും...

മേമ്പോടിക്ക് അല്‍പ്പം നൊസ്റ്റാള്‍ജിയയും ചേര്‍ക്കാം.....!!

സമയം രാത്രി പത്തര ആയിരുന്നത് കൊണ്ട് മാത്രം യുവബ്ലോഗനിലെ ക്ഷോഭിക്കുന്ന യുവത്വം ലോലവും തരളവുമായി...
അല്ലെങ്കിലും സീരിയസ് ചവറുകള്‍ ഇവിടെ ആരുവായിക്കാന്‍...!

അയാള്‍ ഒന്നാം ബ്ലോഗ്‌ ഗുരുവിന്റെ ഉപദേശമോര്‍ത്തു....
''നര്‍മത്തില്‍ ചാലിച്ച അനുഭവക്കുറിപ്പുകള്‍..''..!!!
അനുഭവങ്ങളുണ്ട്..ഇല്ലെങ്കില്‍ ഉണ്ടാക്കാം..പക്ഷെ ചാലിക്കാനുള്ള നര്‍മം മാത്രം എത്ര കറന്നിട്ടും വരുന്നില്ല....അപ്പൊ പിന്നെ സെന്റിയും പ്രേമവും തന്നെ രക്ഷ..

പ്രേമത്തിന്റെ അവസാന വാക്കായിരുന്ന പഴയ ഒന്‍പതു ബി യിലെ ഒടുക്കത്തെ സുന്ദരി സുഹറ കെ.പി യെ മനസ്സില്‍ ധ്യാനിച്ച്‌ അയാള്‍ കഥയെഴുതാനിരുന്നു...

ഇനി മൂഡ്‌ ക്രിയേറ്റു ചെയ്യണം....
മനസ്സ് തരളിതവും വികാരലോലവുമാക്കി....ഈസ്റ്റ്‌ കോസ്റ്റിന്റെ പാട്ടുവച്ചു....

കഥയില്‍ നായകനും നായികയും വില്ലനും വേണം...കേരളത്തിന്റെ തളിരും കുളിരും വേണം...
പ്രവാസികള്‍ നൊസ്റ്റാള്‍ജിയ അടിച്ചു പണ്ടാരമാകണം...
യുവബ്ലോഗന്റെ മനസ്സിലേക്ക് ഒരു സുന്ദരന്‍ പ്രണയ കഥ പെയ്തിറങ്ങി.....

കുട്ടനാടിന്റെ പശ്ചാത്തലത്തില്‍...അറുപതുകളില്‍ നടക്കുന്ന കഥ....റോഡും ബസ്സും തീവണ്ടിയുമില്ലാത്ത ആലപ്പുഴയിലെ ഒരു ഗ്രാമം...യാത്ര വള്ളങ്ങളില്‍ മാത്രം......നായിക സ്ഥലത്തെ പ്രമാണിയുടെ മകള്‍... ഉയര്‍ന്ന നായര്‍ തറവാട്ടിലെ അംഗം...പേര് ശ്രീദേവി...നല്ല വിദ്യാഭ്യാസം...നായകന്‍ ഒരു ഏഴാം കൂലി ആകണം...പണിയൊന്നുമില്ലാതെ ഉത്സവപ്പറമ്പുകളില്‍ മുച്ചീട്ടും കളിച്ചു തെണ്ടി നടക്കുന്ന ഒരുവന്‍...പക്ഷെ സ്നേഹസമ്പന്നന്‍...പേര് ദാസന്‍....

പക്ഷെ ഇവരുടെ പ്രമം എവിടെ തളിരിടും..പൂവിടും..കായ്ക്കും..???

ആലപ്പുഴയല്ലേ സ്ഥലം....

അപ്പൊ തോണിയില്‍ തുടങ്ങാം പ്രേമം...NRI ക്കാര്‍ക്കൊക്കെ നല്ലോണം ഇഷ്ടപ്പെടും...

നാട്ടിലെ പ്രശസ്ത തച്ചന്‍ പണിത കിടിലന്‍ വള്ളം...കായലിലൂടെയുള്ള യാത്ര...ആ യാത്രയില്‍ ഇവരുടെ പ്രണയത്തിനു തളിരിടീക്കാം...
ശ്രീദേവിയും ദാസനും തോണിയില്‍ വച്ചു ലൈനാവുന്നു...!!
യാത്രയ്ക്കിടയിലെ ഇവരുടെ ലൈനടി ശ്രീദേവിയുടെ അമാവന്റെ മോനും മുറചെറുക്കനുമായ ദിവാകരന്‍ കാണുന്നു...അവിടെ കുറെ സെന്റി...
പക്ഷെ ദാസനിലെ ഹീറോയെയും ദിവാകരനിലെ വില്ലനെയും പുറത്തു കൊണ്ട് വരണം...എങ്ങനെ..

ഒരു ഐഡിയ....

യാത്രക്കിടയില്‍ കായലില്‍ തോണി മറയട്ടെ...അപ്പോള്‍ ദിവാകരന്‍ ശ്രീദേവിയെ രക്ഷിക്കാന്‍ മിനക്കെടാതെ സ്വന്തം കാര്യം നോക്കി പോകണം..ദാസന്‍ സ്വന്തം ജീവന്‍ പോലും മറന്നു ശ്രീദേവിയെ രക്ഷിക്കണം....
ആ സാഹസത്തില്‍ ദാസന്‍ മുങ്ങി മരിക്കട്ടെ...അപ്പൊ സെന്റി കുറെ കൂടി വര്‍ക്ക്‌ഔട്ട്‌ ആകും.....
വേണമെങ്കില്‍ കഥ ഫ്ലാഷ് ബാക്ക് ആയി ശ്രീദേവിയുടെ ഓര്‍മകളിലൂടെയും പറയാം...

കൊച്ചു മക്കള്‍ക്ക്‌ മുന്നില്‍ പഴയ പ്രണയ കഥ അയവിറക്കുന്ന നായിക..!!

അപ്പോള്‍ നൊസ്റ്റാള്‍ജിയക്ക് ഇത്തിരി കട്ടി കൂടും....!!

യുവബ്ലോഗനു സന്തോഷം കൊണ്ടിരിക്കാനാവാതെ വന്നു...

''കണ്ണു നനയിച്ചു''...''മനസ്സ് നൊന്തു''...''ഹൃദയത്തെ സ്പര്‍ശിച്ചു'' എന്നുള്ള കമന്റുകളൊക്കെ കിട്ടും...
ഫോളോവേര്‍സ്  ലിസ്റ്റില്‍ പെമ്പിളേരുടെ എണ്ണം കൂടി വരും...!!

അത്യധികം ആഹ്ലാദത്തോടെ ഒരു ബ്ലോഗ്‌ പുലിയുടെ ഉദയം സ്വപ്നം കണ്ടുകൊണ്ടു അയാള്‍ ടൈപ്പ് ചെയ്യാന്‍ തുടങ്ങി...
രാത്രി ഒന്നരയോടെ എഴുതിത്തീര്‍ത്തു..ഒന്നു കൂടി വായിച്ചു നോക്കിയപ്പോള്‍ അയാള്‍ സ്വയം കുളിര് കോരി....ഗ്രാമ വിശുദ്ധിയുള്ള അനശ്വര പ്രണയകഥ..കുട്ടനാടിന്റെ പശ്ചാത്തലത്തില്‍...

ഗള്‍ഫ്‌ പ്രവാസികളും ഐ.ടി ചെല്ലക്കിളികളും എല്ലാം വീഴും...!!

കഥ പോസ്റ്റ്‌ ചെയ്യുന്നതിന് മുന്‍പ് യുവബ്ലോഗന്‍ സെറ്റിംഗ്സ് എല്ലാം ഒന്നു കൂടി പരിശോധിച്ചു.......സകല അഗ്രഗേറ്റരുകളിലും വരണം....

കഥയുടെ ഫീലില്‍ താന്‍ മുന്‍പു ക്രോസ് ഫയര്‍ ചെയ്ത സകല  ദുഷ്ട കഥാപാത്രങ്ങളെയും ബ്ലോഗ്‌ ഗുരുക്കന്മാരേയും മറന്നു കൊണ്ട് അയാള്‍ കഥ പോസ്റ്റ്‌ ചെയ്തു....

സിസ്റ്റം ഓഫ്‌ ചെയ്തു വളരെ സംതൃപ്തിയോടെയാണ് അയാള്‍ ഉറങ്ങാന്‍ കിടന്നത്...അസ്തിത്വ പ്രശ്നങ്ങളും ആനുകാലിക സംഭവങ്ങളും ജീവിതാനുഭവങ്ങളും പോയി തുലയട്ടെ....ഹൃദയത്തെ തൊട്ടുണര്‍ത്തുന്ന പ്രണയ കഥകള്‍ വാഴട്ടെ...രചനയുടെ ഗര്‍ഭധാരണവും പ്രസവവും എല്ലാം ഒരുമിച്ചു കഴിഞ്ഞതിന്റെ ക്ഷീണത്തില്‍ അയാള്‍ തളര്‍ന്നുറങ്ങി......
താന്‍ 'മുതിര്‍ന്ന ബ്ലോഗ്ഗര്‍' ആയിത്തീരുന്നത് സ്വപ്നവും കണ്ടു....

പിറ്റേ ദിവസം ബ്ലോഗ്‌ ഓപ്പണ്‍ ചെയ്യുമ്പോള്‍ യുവബ്ലോഗന്‍ ആകെ ത്രില്ലിലായിരുന്നു....

ആരായിരിക്കും ആദ്യ കമന്റ്‌ ഇട്ടിട്ടുണ്ടാവുക..?? എന്തായിരിക്കും റെസ്പോണ്‍സ്..?

പോസ്റ്റിനു കീഴെ സിക്സ്  കമന്റ്സ് എന്ന് കണ്ടതും അയാളുടെ ഹാര്‍ട്ട് ആവശ്യമില്ലാത്ത വേഗത്തില്‍ മിടിക്കാന്‍ തുടങ്ങി...

ആദ്യ കമന്റ്‌ തന്നെ ഒരനോണിക്കമന്റ്റ് ആയിരുന്നു.......
അതു ഇപ്രകാരമായിരുന്നു..

''അല്ലിഷ്ട്ടാ തന്റെയീ കഥ....ഇത് ''ടൈറ്റാനിക് '' അല്ലേ.!!!....അടിച്ചു മാറ്റല്‍ ഇങ്ങനെയുമുണ്ടോ...??!!!!!!''

യുവബ്ലോഗന്‍ വിവശനായി...

''ഒരു തേങ്ങ പ്രതീക്ഷിച്ചു വന്നപ്പോള്‍ എന്റയര്‍ തേങ്ങാക്കുല തന്നെ കിട്ടിയിരിക്കുന്നു....!!''

അടുത്ത കമന്റ്‌ സനോണിയായിരുന്നു...അതും ഒരു ബ്ലോഗിണിയുടേത്...
വസ്തുനിഷ്ഠമായ പഠനം തന്നെ നടത്തിയിരിക്കുന്നു കുമാരി ബ്ലോഗിണി....

''മനോഹര കഥ....ഇത് നമുക്ക് സിനിമയാക്കിയാലോ...?
മുച്ചീട്ട് കളിക്കാരന്‍ ദാസന്‍ - ഡി കാപ്രിയോ...!!!
കര പ്രമാണിയുടെ മകള്‍ ശ്രീദേവി - കെയ്റ്റ് വിന്‍സ് ലെറ്റ്...!!!
പശ്ചാത്തലം - വേമ്പനാട്ടു കായല്‍.......!!!!!!!!!!!!!''

..........കൂടുതല്‍ വായിക്കാന്‍ നില്‍ക്കാതെ യുവബ്ലോഗന്‍ സിസ്റ്റം ഷട്ട് ഡൌണ്‍ ചെയ്തു........

ആ ബ്ലോഗില്‍ തുടര്‍ന്നു വന്ന കമന്‍റുകളെല്ലാം നര്‍മം ചാലിക്കാത്ത, തീഷ്ണമായ ജീവിതാനുഭവങ്ങള്‍ സമ്മാനിക്കുന്നവ തന്നെയായിരുന്നു.....
.

38 comments:

chithrakaran:ചിത്രകാരന്‍ said...

ഹെന്റെ ഭഗവാനേ എന്തൊരെഴുത്താണിത് ...!!!!
:)

മുരളി I Murali Mudra said...

സത്യമായും 'ലവന്‍' ഞാനല്ല....
:)

പ്രവീണ്‍ വട്ടപ്പറമ്പത്ത് said...

മച്ചൂ....അടിച്ചു പൊളിച്ചു പണ്ടാറമടക്കിക്കളഞ്ഞല്ലോ...ഹഹ..ഇതൊക്കെ തന്നെയാ മാഷെ നമ്മുടെ ‘ഫൂ’ലോകം

വല്യമ്മായി said...

പോസ്റ്റ് രസിച്ചു :)

അരുണ്‍ കരിമുട്ടം said...

ഈ പോസ്റ്റ് വായിച്ചപ്പോള്‍ 'മായക്കണ്ണാടി' എന്ന തമിഴ് സിനിമയില്‍ ഫെയ്മസ്സ് ആകാന്‍ നടക്കുന്ന ചേരന്‍റെ കഥ അടിച്ചു മാറ്റിയതാണോന്ന് ഒരു സംശയം!!!
:)
ഹ..ഹ..ഹ
കലക്കി മച്ചു.

Cartoonist said...

തകര്‍പ്പന്‍ ചങ്ങാതീ.
പോട്ടെ, സമയമില്ല. ഒന്നു ഫേയ്മസ്സാവണം :)

പാവത്താൻ said...

മരക്കച്ചവടക്കാരന്‍ ഹാജിയാരും 3 ഭാര്യമാരും. 3 പെരിലുമായി 4 മക്കളും മൂത്ത മോനെ കാട്ടിലേക്കയച്ചതും ഒക്കെ ഓര്‍മ്മ വരുന്നു.

മുരളി I Murali Mudra said...

@പ്രവീണ്‍ : നന്ദി..വീണ്ടും വരിക..

@വല്യമ്മായി : കണ്ടതില്‍ സന്തോഷം..

@അരുണ്‍ : അപ്പൊ ചേരനും ഫെയ്മസ് ആവാന്‍ നടക്കുകായിരുന്നോ....
ഹ ഹ ഹ ഇതൊരു കോമണ്‍ പ്രശ്നം തന്നെ....
ഫെയ്മസോമാനിയ....(ആരോടും പറയേണ്ട..ഞാനും ഒരു 'യുവ' ബ്ലോഗനാണ്....)
താങ്ക്സ് ട്ടോ മച്ചൂ...വീണ്ടും കാണണം..... :) :)

@കാര്‍ട്ടൂണിസ്റ്റ് : ഞാനും വരുന്നു സജീവേട്ടാ എനിക്കും ഫെയ്മസാകണം..ഹ ഹ ..
കണ്ടതില്‍ വളരെ സന്തോഷം...വീണ്ടും വരണം.. :) :)

@ പാവത്താന്‍ : ഇതിഹാസങ്ങള്‍ക്ക് മരണമില്ലല്ലോ...ഹാജിയാരിലൂടെയും ഇതിഹാസങ്ങള്‍ പുനര്‍ജനിക്കും..ഹ ഹ.. :)

Kiranz..!! said...

ഹ.ഹ..മുരളീ സത്യം പറ.ഇതൊരാറുമാസത്തിനു മുന്നേ എഴുതിയതല്ലേ.എന്നിട്ട് തക്കം പാർത്തപ്പോ പോസ്റ്റിക്കളഞ്ഞതല്യോ :) ( 512 കെബി ഖത്തറിൽ നിർത്തലാക്കിയിട്ട് ആറുമാസമായി :)

പട്ടേപ്പാടം റാംജി said...

ഞാനെന്തു ചെയ്യണമെന്ന് വിചാരിക്കുമ്പോഴാണ്‌ ഈ ബ്ലോഗ് വായിക്കാനിടയായത്.
ആശ്വാസം..
മനോഹരമായി സത്യങള്‍ വിളിച്ചുപറഞത് ഭംഗിയായി..

ഉറുമ്പ്‌ /ANT said...

നന്നായി ചങ്ങാതി.
ഫേമസ്സാകാൻ ഇങ്ങനൊരു വഴിയുണ്ടല്ലേ?
ഞാനൊന്നു ശ്രമിക്കട്ടെ.

Jayesh/ജയേഷ് said...

rasikan katha..blog vanneppinne malayalikalute urakkam kuranjittundalle

ശ്രീ said...

ഹ ഹ. ദാസന്‍ ഡീകാപ്രിയോയും ശ്രീദേവീ വിന്‍സ്‌ലെറ്റും കലക്കി :)

വശംവദൻ said...

എഴുത്ത് കിടലൻ!

''ഒരു തേങ്ങ പ്രതീക്ഷിച്ചു വന്നപ്പോള്‍ എന്റയര്‍ തേങ്ങാക്കുല തന്നെ കിട്ടിയിരിക്കുന്നു....!!

ഹ..ഹ..

Sukanya said...

തോണി മറിഞ്ഞ് രക്ഷപ്പെടലും ഒക്കെ വായിച്ചപ്പോള്‍ തന്നെ ടൈറ്റാനിക് ഓര്‍മ വന്നു. അതിനിപ്പോ യുവ ബ്ലോഗ്ഗനെ കുറ്റപ്പെടുത്താന്‍ പറ്റുമോ?
ഹഹഹ ഇതു എന്തായാലും നര്‍മത്തില്‍ ചാലിച്ച് അല്ല മുങ്ങി എഴുതി.

മുരളി I Murali Mudra said...

@ കിരണ്‍സ് : സ്വകാര്യം പറയാം...ഇപ്പൊ 2MB ആണ്..ഹഹ .. :)

@ pattepadamramji : ഹേയ് സത്യമൊന്നുമല്ല...ചുമ്മാ..... :)

@ഉറുമ്പ് : ഫെയ്മസാകാന്‍ നൂറു വഴികള്‍.....:)

@ജയേഷ് : ഡെയിലി ഒന്ന് ബ്ലോഗിയില്ലെങ്കില്‍ എങ്ങനെ ഉറക്കം വരും.. :)

@ശ്രീ : ഡാങ്ക്സ്. :)

@ വശംവദന്‍ : :) :)

@ സുകന്യ : അത് തന്നെ യുവ ബ്ലോഗന്റെ വിലാപം..ഹ ഹ .. :)

Areekkodan | അരീക്കോടന്‍ said...

ഹ ഹാ..കലക്കി...അപ്പോള്‍ ഫെയ്മസ് ആകാന്‍ നര്‍മ്മത്തില്‍ ചാണകം കലക്കണം അല്ലേ? എങ്കി ഒന്ന് ശ്രമിച്ചു നോക്കട്ടെ....

Dileep said...

ലേറ്റസ്റ്റ് ദുഷ്ടന്‍ തടിയന്റവിട നസീറാണ്....

പിന്നെ വേണമെങ്കില്‍.... അജ്മല്‍ കസബ്...!!

ആന്റി ടെററിസ്റ്റ് സ്ക്വാഡ് പാതിരാത്രി ഹെലി കൊപ്ടറില്‍ തൂങ്ങിയിറങ്ങി വീടിന്റെ ഓടിളക്കി അകത്തു കയറുന്നത് മനസ്സിലോര്‍ത്തപ്പോള്‍ അവരെയും വിട്ടു...

ha ha kollam

Manoraj said...

ദാസന്‍ ഡീകാപ്രിയോയും ശ്രീദേവീ വിന്‍സ്‌ലെറ്റും കലക്കി

kollam suhruthe... rasikan ennu thanne parayam..famous ayalo?

.. said...

അന്യായ സാധനം തന്നെ കേട്ടോ....................

സന്തോഷ്‌ പല്ലശ്ശന said...

നല്ല എഴുത്ത്‌ രസിച്ചു...

Typist | എഴുത്തുകാരി said...

ഫേയ്മസ് ആവാന്‍ ‍ അങ്ങനെ എന്തെങ്കിലുമൊക്കെ ചെയ്യേണ്ടിവരുമെന്നു തന്നെയാ തോന്നണേ, എന്തായാലും ഒരു സൂത്രം കിട്ടിയല്ലോ...

മുരളി I Murali Mudra said...

അരീക്കോടന്‍
ദിലീപ്
മനോരാജ്
ജിക്കൂസ്
സന്തോഷ്‌ പല്ലശ്ശന
Typist | എഴുത്തുകാരി

ഇവിടെ എത്തിയ എല്ലാവര്‍ക്കും നന്ദി..
:) :)

മുഹമ്മദ്‌ സഗീർ പണ്ടാരത്തിൽ said...

പ്രിയദര്‍ശന്‍ വായിക്കാതിരിക്കട്ടെ എന്നാണ് എന്റെ പ്രാര്‍ത്ഥന

Anonymous said...

വളരെ നന്നായിട്ടുണ്ട്..കേട്ടോ..ആശംസകള്‍..

Anil cheleri kumaran said...

അടിപൊളി എഴുത്ത്. തകര്‍ത്തു. സമ്മതിച്ചിരിക്കുന്നു.

Rare Rose said...

വിലാപങ്ങള്‍ തകര്‍പ്പനായിട്ട് എഴുതി.നല്ലോണം ചിരിച്ചു.:)

അഭി said...

കൊള്ളം നന്നായിരിക്കുന്നു

ആര്‍ദ്ര ആസാദ് / Ardra Azad said...

കലക്കി.

സകലമാ‍ന യുവ ബ്ലോഗര്‍മാരുടെയും മനസ്സെങ്ങനെ വായിച്ചെടുത്തു?

Jenshia said...

കൊള്ളാലോ മുരളിയെ... :)

മുരളി I Murali Mudra said...

മുഹമ്മദ്‌ സഗീര്‍
Bijli
കുമാരന്‍
Rare Rose
അഭി
ആര്‍ദ്ര ആസാദ്
Jenshia
എല്ലാവര്ക്കും നന്ദി..സന്തോഷം..
:) :)

കുരാക്കാരന്‍ ..! said...

"'കണ്ണു നനയിച്ചു''...''മനസ്സ് നൊന്തു''...''ഹൃദയത്തെ സ്പര്‍ശിച്ചു'' എന്നുള്ള കമന്റുകളൊക്കെ കിട്ടും...".....

നന്നായിട്ടുണ്ട് മാഷെ

ഭായി said...

സത്യമായും വായിച്ചിട്ട് എന്റെ കണ്ണുനിറഞു പോയി!
:-)

തകര്‍ത്തു കേട്ടോ!

വരവൂരാൻ said...

എഴുത്ത്‌ രസിച്ചു...
നന്നായിട്ടുണ്ട്..ആശംസകള്‍..

സുമേഷ് | Sumesh Menon said...

ഇതു എന്നെ ഉദ്ദേശിച്ചാണ്, എന്നെമാത്രം ഉദ്ദേശിച്ചാണ്. ഞാന്‍ ശക്തമായി പ്രതിഷേധിക്കുന്നു.

ചിരിച്ചു പണ്ടാരടങ്ങിഷ്ട :)

Mohanam said...

അപ്പോ ഇങ്ങനെയും ഫെയ്‌മസ്‌ ആകാം അല്ലേ..?

priyag said...

ആന്റി ടെററിസ്റ്റ് സ്ക്വാഡ് പാതിരാത്രി ഹെലി കൊപ്ടറില്‍ തൂങ്ങിയിറങ്ങി വീടിന്റെ ഓടിളക്കി അകത്തു കയറുന്നത് മനസ്സിലോര്‍ത്തപ്പോള്‍ അവരെയും വിട്ടു...

rohit said...

murlyettaa.........,

ithey sssi angu bodhichu tto.....

kidilam languae flexibility....

and a brave attempt too.......


kurachadhikam blogganmaarithode pani nirthum theercha.........



hats off